Seni Sastra: Bakisah Bahasa Banjar

Pusang wan Kampus

Bubur sumsum dicampur lakatan

Assalamualaikum pian sabarataan

Wayahini ulun handak mangisahakan sabuting kesah pangalaman nang cukup mawah di hati nang pina mamusangi nah.

Ulun ni mahasiswa biasa haja pang, ka kampus tu paling kuliah haja. Nang jadi masalah ni saban hari ulun tulak ka kampus tuh, di awal-awal masuk semester lima ni ada nang pina kada nyaman, dosennya ni jarang banar masuk, malahan kadida masuk sama sekali sudah partamuan ka 3 atawa 4 asanya masih jua kadida turun, ada sakitar 2 sampai 3 mata kuliah. Jadi kayapalah, kalawasan libur tu kada nyaman jua pang sabanarnya, napang bayar kuliah larang-larang, pakai duit kuitan pulang. Jadi rasa kada adil ja kayatu nah, mungkin si dosen haur alasannya lagi di luar kota, luar pulau, luar negeri, sampai luar angkasa! Nah itu pang masalah dari dosen.

Imbah nitu masalah dari wadah balajar alias kelas. Kelasnya tu barasih haja pang tapi kadang-kadang di bawah meja tu ada haja nang maandak bakas gula batu karet, aseli marigat banar, mana ulun suah tajapai pulang! Hiii., mana kelasnya tu humap, mahasiswanya hibak, jadi amun jam balajaran tu bakabat umatnya nang kaya iwak karing bagalimpangan tu pang tahalang tabujur. Bujur haja pang ada AC-nya tapi remotnya ja kadeda mana bekaratan sudah, harau AC-nya ni kawa dipaakai jua kah atawa sudah kadaluarsa, dijadikan pajangan haja sako, sama banar lawan wadah LCD yang begantung tu nah, itu dari ulun semester 1 nang kakayaitu ja bentuknya, kabelnya pagatan lawan bakarat. Imbah nitu jendelanya betagar, debunya kada ketulungan, spidol lawan penghapusnya hilangan. Asa handak menyumpah ada jua di kelasnya nih inya tapi jangan gin sengeri apapaun kelas ini tapi di sini pang sudah ulun belajar, ucap dalam hati. Nah itu tadi nang di kelas.

Imbah nitu masalah fasilitas di kampusnya tu kada sampai di kelas haja, ada lagi sabuting tampat nang kada kalah penting gasan kita sabarataan amun handak melakukan sesuatu yang berkaitan wan hajat hidup manusia, apakah itu? Ia! WC.

Aduuh hai asa pilu banar hati karena WC-nya ngeri banar, kunci susunduknya tu nah kadida, jadi amun handak (maaf) bakamih tahani tu pang lawangnya disandari kah atawa ditahan pakai tangan sekira kada kawa didorong urang dari luar, atawa amun handak,, bawai kawan, kada umpat babuat ka WC pang, manjagaiakan haja di muka WC kalau-kalau ada nang handak masuk. Tapi ulun ni lakian beapa bebaya ke WC ja mambawai kawan. Tapi sukur haja pang banyunya tu ada, mudahanai barasih.

Nah ini yang terakhir yang di luar banar parak gerbang kampus.Waktu nitu ada salah satu UKM (unit kegiatan mahasiswa), kawan ulun tu anggotanya, inya handak maminjam gedung pementasan organisasinya, tapi jar saklinya malah disuruh bayar sekitar 400ribu. Haww maka kami bahari ada jua pementasan itu gratis, sakalinya apa nah alasan paman penjaga gedungnya? 

 

“Duitnya tapakai gasan meolah lawang gerbang hanyar tu nah nang di muka”, ujar Pamannya. 

Nah itu pang hal-hal nang maolah ulun pusang. Kampus ulun ni lah, rektornya hanyar tapilih. Sebagai urang kampus ni pasti ai baharap pamimpin nang hanyar ni mambawa parubahan bearti gasan kenyamanan urang-urangnya karana jabatan itu marupakan amanah kalo nang harus dilaksanakan. Jadi mudahanai, kampus nang bungas wan langkar ni semakin tuha semakin baik jua kualitasnya. Aamiin.

Nah mun panambayan bapantun, pandudiannya harus bapantun jua!

Pinang anum barangkap rangkap

Pinang tuha barundun rundun

Gasan nang anum ulun minta map

Gasan nang tuha ulun minta ampun

Terima kasih.

Wassalamualaikum wr.wb.